वृत्त-देवप्रिया/कालगंगा
      गझल
::::::::::::::::::::::::::::::::
पत्थरांचे देव झाले
माणसांची पत्थरे
माकडांचा गाव येथे
भावनांची लक्तरे

जाणिवांना,नेणिवांना
भोग आता भोगतो
भावभक्ती ना कळे ही
सोहळे आसक्त रे

धर्म,जाती,पंथ,गोत्रे
जानव्यांचे चोचले
सोंगडे पंचांग, पोथी
चोरट्यांची दप्तरे

श्वास द्यावे,श्वास घ्यावे
माणसाने माणसा
हात हाती देत सारी
संपवावी अंतरे

या धरेने,या तरूंनी
दूर कोणा लोटले ?
जागवावे अंतरंगा
सांडताना रक्तरे

जन्म जावा शोधण्याला
का जगू ? कोणासवे ?
जीवनाच्या काळराती
सापडावी उत्तरे
::::::::::::
कवी किरण अहिवळे
फलटण,जि.सातारा
मो.नं.७३०४७५६३६८