गझल

अशी ये...
अशी ये जसा चांद काळोख राती
दिवे लागणीला जणू कैक वाती

मनाशी मनाचे दुवे सांधताना
जळाव्यात माझ्या तुझ्या लाख जाती

कशाला हवा चांदण्यांचा बिछाना
तुला लोळण्याला मऊ पाक छाती

जरी पावसाने भिजावी धरा ही
तुझ्या पावलांनी शहारेल माती

फुलांचे जसे ताटवे बांधलेले
अता घट्ट व्हावी घरातील नाती

खुळी पापणी काठ ओलावलेली
सुन्या सांजवेळी तुझे गीत गाती

मला वादळांची तमा काय भीती?
लढाया पुरे हात हातात हाती

मला दान दे काळजाच्या कुपीचे
तुटो बंध सारे गळो कूळ याती
:::::::::::;;;;;;;;;;
कवी किरण अहिवळे
मु.पो. सोमंथळी
ता. फलटण, जि. सातारा
मो.नं.७३०४७५६३६८