गझल

आता...
लावते झुंजावयाला भाकरीची कोर आता
फाडते देहास माझ्या वासनेची बोर आता

काजव्यांनी काल राती चांदण्यांशी बंड केले
कावळ्यांनी नाचणारे ठार केले मोर आता

बोकडांना चाप देण्या काढले मोर्चे कितीदा
भोगली जाते नव्याने रोज माझी पोर आता

जाहले स्मशान आता स्वप्न रानी पेरलेले
जीवनाशी वैर माझे मित्र झाला दोर आता

का खुडावे या कळ्यांना जन्मण्या आधी जगाने
हिंडती भुंगे हजारो मायबापा घोर आता

बाप माझा ढाल आहे संकटांना झेलणारा
वादळांनाही पुरेसा राहिला ना जोर आता

टेबलांना पोखरावे लाचवेड्या वाळवीने
शासनाने पोसलेले कोडगे हे चोर आता
::::::::::::::::::::::;;;;;
कवी किरण अहिवळे
मु.पो.सोमंथळी
ता.फलटण,जि.सातारा
मो.नं.७३०४७५६३६८